Балалар фольклоры – халық дәстүрлерін сақтаудың бастауы

Аңдатпа

. Бұл мақалада балалар фольклорының халық дәстүрлерін сақтаудағы маңыздылығы
қарастырылады. Фольклор туындылары болашақ ұрпаққа эстетикалық тәрбие беруде маңызды
орын алады. Балаларды фольклор жанрларымен таныстыру, тыңдағанын қайта әңгімелеп беруге,
мақал-мәтелдерді, жаңылтпаштарды, жұмбақтарды мәнерлеп айтуға үйрету эстетикалық тәрбие
мүмкіндіктерін шешуге көмектеседі. Демек, қазақ балалар фольклоры – ұлттық мәдениеттің
дамуы мен жаңаруының негізі. Ол – өмір сүрудің мәні мен мазмұнын, ұлттық өркениеттің тарихи
тағдырын, болмысын, дүниетанымын айқындайтын өшпес мұра. Егемендік алғаннан кейінгі
жылдарда баланың жеке тұлғасын, халқымыздың асыл мұрасы қазақ фольклорын, дәстүрін
құрметтеу, елін, жерін сүю, адамгершілік және эстетикалық сезім әрекеттерін бекіту мақсатында
жасалған тұжырымдамалар ауыз әдебиетінің халық санасындағы отаншылдық, адамгершілік,
гуманизм, эстетикалық мәдениет пен рухани байлықты сақтаудағы рөлін, сол халықтың өткендегі
өмірін, аңсау-арманын, әдет-ғұрпын, халық тәрбиесіндегі фольклор туындыларының жемісін
көрсетеді. Балаларға арналған фольклорлық шығармалар мектеп жасына дейінгі балалардың жас ерекшелігіне сәйкес балалардың өзіндік қиял-армандарын, талаптарын, ой-пікірлерін, айналадағы
құбылысты эстетикалық тұрғыдан қабылдау, сезіну мүмкіндіктерін қалыптастыруға негізделген,
халқымыздың ғасырлар бойы жинаған асыл мұрасы болып табылады. Балаларға арналған фольклор
туындылары балалардың қызыға да сүйсіне тыңдайтын, шығармашылық қасиеттерін арттыратын,
логикалық ойлау қабілеті мен сөздік қорын дамытатын құнды жанр.